Ako ay Pilipinong may mga karapatan
Na dapat ipahayag at dapat ipaglaban
Ang aking sandata sa pakikipagtagisan
Ay wikang Filipino- ang wika ng matapang.
Ako ay Pilipinong may mga adhikain
Sa aking isipan ay may wagas na layunin
Ang kasangkapan ko sa pagbunyag ng mithiin
Ay wikang Filipino - wika ng may hangarin.
Ako ay Pilipinong sa puso ay may pintig
Sa aking kaluluwa'y may himnong humihimig
Ang aking instrumento sa pag-awit ng tinig
Ay wikang Filipino- ang wika ng pag-ibig.
Ako ay Pilipino, Pilipinong may laya
May layang lumipad tulad ni Haring Agila
Ang tangan kong pluma sa pagkampay ng diwa
Ay wikang Filipino- ang wika ng malaya.
Ako ay Pilipino, ikaw ay Pilipino
Ang aking karapatan ay ang karapatan mo
Atin ang karapatan na gamitin nang husto
Ang wikang Filipino- wika nang Pilipino.
No comments:
Post a Comment