*AKALA NILA*

*AKALA NILA*

Akala nila

Komo't hindi ka kumikita ng pera

Sa iyong mga likha

Ay wala iyong halaga;

Akala nila

Komo't hindi ka ka-successful gaya ng iba

Ay wala ka nang kwenta.

Ang hindi nila alam

Ay napakalaking bahagi iyan

Ng kabuluhan ng iyong buhay;

Ang hindi nila alam

Ay isa yan sa pinakadahilan

Kung bakit Kita nilikha.

Ang hindi nila nadarama

Ay ang iyong kaligayahan

Sa tuwing ginagawa mo ang mga iyon;

Ang hindi nila nakikita

Ay ang kabutihang ibig mong ibahagi

Sa pamamagitan ng iyong mga gawa.

Ang hindi nila naririnig

Ay ang mga lihim na pasasalamat ng iba

Na naisagawa ang mga iyon;

Ang hindi nila pinapanghawakan

Ay ang katauhan ng iba

Na nabigyan mong inspirasyon dahil doon.

Hayaan mo sila

Sa kanilang mga maling akala.

Hayaan mo sila

Sa kanilang mga pagtatawa.

Hayaan mo sila

sa kanilang mga sabi-sabi

Na walang nagkakagusto ng iyong mga ginagawa.

Dahil, AKO,

AKO, na nagkaloob ng iyong talento

Ang siyang nagtitiwala sa iyo;

Dahil AKO,

AKO, na nagbigay ng iyong kakayahan

Ay patuloy na naliligayahan

Na gawin kang Aking instrumento

Sa paglikha ng mga iyon.

At sa iyong pagpanaw,

AKO, na iyong DAKILANG MANLILIKHA

Ang bahala sa iyong kaluluwa.